١٠ نصايح للناس اللي بتقطع في الجيم 

ساعات الواحد بيجي عليه وقت بيبقى مش قادر يروح التمرين أو وراه شغل و يقول خلاص مش مهم النهاردة هريح و هنزل بكرة و يلاقي نفسه يوم في التاني في التالت مريح بحجه انه هينزل بكرة لحد ما فجأة يلاقي نفسه متمرنش بقاله أسبوع أو بيتمرن كل 3 أو 4 أيام مره و بتحصل كتير إن ناس بتبطل تمرين خالص بعد ما كانت مستمرة لشهور بسبب الحوار ده طيب نعمل إيه عشان متحسش بالموضوع ده ؟

في الاول خالص خلينا متفقين إن اقصي وقت ممكن التمرينه بتاعتك تاخده هي ساعة او ساعة و نص و إن ساعه اللي هتقضيها في التمرين هي اهم 100 مرة من الساعة اللي هتقضيها قاعد على الفيسبوك أو بتفرج على التليفزيون أو بـتلعب على الموبيل و دي نصايح لو عملتها مش هتفوت معاد تمرينك ابدا

1- متروحش الجيم لوحدك اتفق مع حد من اصحابك و الاحسن انه يكون في مستوي قريب منك في التمرين انكوا تتمرنوا كل يوم في وقت ثابت من اليوم عشان لو واحد كسل يتمرن التاني يزن عليه

2- جهز شنطتك و الهدوم اللي هتتمرن بيها من بليل قبل ما تنام

3- قبل معاد تمرينك متقعدش على السرير أو الكنبه أو أي حاجة مريحة أعمل أي مجهود بسيط قبله زي تجهيز الاكل اللي هتاكله بعد التمرين و أو لو الجيم بتاعك قريب أنزل اتمشي لحد هناك متخدش العربية

4- خلي معاد تمرينك ثابت و يكون بدري على قد ما تقدر و انه ميكونش آخر حاجة في يومك عشان هتبقى تعبان و تقارن التمرين بأنك تخش تنام و غالبا هتختار النوم و حتي لو نزلت اتمرنت هتبقي حاسس إنك تعبان و عايز تنام و مقريف و طبعا ده هيأثر عليك طول التمرين و اتعود دايما تتمرن بدري و تفضي بقيه يومك لشغلك او مذاكرتك

5-خليك مقتنع إن التمرين مهم جدا زى الاكل و الشرب و يوم التمرين اللي هيضيع مش هتعرف تعوضه بكرة

6- كافيء نفسك بعد التمرين بعصير بتحبه أو فاكهة بتحبها و احرم نفسك منه في اليوم اللي متتمرنش فيه

7- الجيم من اهم الحاجات اللي بتأثر علي تمرينتك لو أنت من الناس اللي بتحب التغير غير الجيم بتاعك كل شهر أو شهرين و روح جيم تاني و أعرف ناس جديدة و لو من الناس اللي مبتحبش التغير خليك مقتنع إن الجيم ده بيتك التاني خد خزنة فى الجيم و سيب فيه حاجتك اللي بتستخدمها بعد التمرين اعمل اصحاب ليك هناك انزل في يوم الراحة بتاعتك عدي على الجيم و سلم على صحابك اللي هناك

8- أعمل هدف ليك بس يكون واقعي مثلا إنك تخس/ تزيد ٢ كيلو في مده معينه و اكتبه في نوتة أو على الموبايل عشان متتمرنش و خلاص و كل يوم تمرين بص على نفسك و شوف أنت قربت من هدفك ده بقد إيه و خلي بالك إن اليوم اللي مش هتتمرنه ده مش هيوقفك في مكانك لا ده هيبعدك عن هدفك و كل ما تفوت يوم تمرين كل ما هترجع لورا و تبعد عن هدفك

9- خلي بالك إن التمرين من الحاجات اللي بتأثر على حالتك يعني لو بطلت تتمرن هتلقيك بقيت مهمد و جسمك واجعك و مش فايق زي م كنت بتتمرن فكل ما هتبعد كل ما هتقريف

10 - صور نفسك كل يوم و مش لازم يا سيدي تنزلها على الفيسبوك بس عشان تحس بالفرق و تتأكد دايما إنك بتطلع لقدام مش واقف مكانك و متسمعش لحد يقولك إنت خاسس ولا شكلك مبطل تمرين صدق بس صورك و اوعى تبطل تتصور يمكن صورة النهاردة هي اللي تخليك تنزل تتمرن بكرة