ألام العضلات و الإستشفاء منها

كلنا لما بنتمرن و بنشيل أوزان تقيلة خلال التمرين و مع أخرعدتين تلاتة فى المجموعة بنحس بوجع ملحوظ فى العضلة و بعد لما بنخلص المجموعة و نريح الوجع بيروح و نرجع ندخل المجموعة اللى بعديها و هكذا, الوجع ده اسمه وجع العضل الحاد و ده بيحصل لما بنتمرن بقوة و تركيز و ده ناتج عن تراكم كيميائى و تراكم السوائل فى الأنسجة العضلية و لما بيحصل التراكم ده العضلة بتبتدى تفقد قوتها و الوجع بيبقى أسواء بس بيروح بمجرد لما نريح بين المجموعات لكن بعد لما بنخلص تمرين خالص و بعديها ب 8 ساعات أو أكتر بنحس بوجع مختلف فى العضلات هو وجع قوى بس مش سىء بس للأسف بيبقى متعب لو انت مش متعود عليه و بعد 24 ساعة من التمرين الوجع بيوصل لمرحلة انك ساعات مابتبقاش قادر تتحرك و ده متعارف عليه بأسم (وجع العضلات المتأخر) و ده بيخلى كتير جدا من المبتدئين يكرهوا التمرين و مايبقوش عايزين يكملوا تمرين خالص لأنه بالنسبالهم حاجة متعبة و مش مريحة و ده لأنهم فى الغالب مش بيعرفوا يتغلبوا على الوجع ده إزاى

- وجع العضلات المتأخر اللى بيحصل ده ناتج عن حركات الإطالة العضلية فى التمرين يعنى مثلا و انت بتلعب تبادل باى بوزن و انت نازل بالدمبل لتحت دى حركة إطالة بتخلى الأنسجة العضلية لعضلة الباى تتحط تحت ضغط من الوزن اللى انت بتلعب بيه و يحصلها إطالة.

- السبب الفعلى الحقيقى لوجع العضلات المتأخر مش معروف الى الأن بس السبب المتعارف عليه هو إن أثناء حركات الإطالة فى التمرين بيحصل تقطيعات صغيرة فى العضلات على المستوى الخلوى و مستقبلات الوجع فى العضلات بترسل إشارة بالوجع ده للمخ و بعدها الكالسيوم بيبتدى يتراكم فى العضلات و ده بيسبب الوجع لاحقا.

● إزاى تخفف ألم وجع العضلات المتأخر:

1- حاول لما تبتدى تمرين جديد انك تتدرج فيه ماتدخلش قفش و تدخل تشيل أوزان كبيرة و خلاص لأ إتقن التمرين الأول و اتعلم الحركة الصحيحة و تدرج فى الأوزان عشان عضلاتك تبتدى تتأقلم على الشكل الجديد لإن الموضوع ده بيأثر بشكل كبير على وجع العضلات المتأخر.

2- الجلوتامين بيساعد فى تقليل أعراض وجع العضلات المتأخر ممكن تستخدم 5 جرام قبل و بعد التمرين عشان تقلل من أعراضه.

3- فى مكملات غذائية كتير بتساعد فى تقليل ألام وجع العضلات المتأخر زى الكرياتين,التورين,سيترولين مالات و الأحماض الأمينية المتشعبة.

4- القهوة قبل التمرين بساعة بتقلل الألم الناتج من وجع العضلات المتأخر فى اليوم التانى و الثالث بعد التمرين.

5- النوم من أهم الحاجات أو يعتبر أهم حاجة للتقليل من وجع العضلات المتأخر, معظم عملية الإستشفاء بتحصل أثناء النوم فحاول دايما إنك ماتنامش أقل من 8 ساعات ليلا يوميا عشان عضلاتك تعمل عملية إستشفاء بشكل كامل.