ليه هرمون التستوستيرون بيقل
هرمون التستوستيرون من أهم الهرمونات البنائية فى الجسم و هو مسؤول عن بناء الكتلة العضلية و رفع معدل حرق الدهون و زيادة كثافة العظام و العمل على زيادة تخليق البروتين فى العضلات.
● التستوستيرون و الكورتيزول:
فى جسمنا فى نوعين من أنواع الهرمونات هرمونات بنائية زى التستوستيرون و الإنسولين و هرمون النمو و هرمونات هدامة زى الكورتيزول و الأدرينالين و الجلوكاجون لو الجسم فى حالة بنائية بتكون الهرمونات البنائية مستوياتها مرتفعة و تخليق البروتين بيبقى عالى و بالتالى الكتلة العضلية بتزيد لو الجسم فى حالة هدم بتكون الهرمونات الهدامة مرتفعة و نسبة تخليق البروتين بتقل و بنخسر الكتلة العضلية.
وظيفة هرمون التستوستيرون هى الإبقاء على حالة البناء من خلال عملية تخليق البروتين و وظيفة هرمون الكورتيزول ان الجسم بيفرزه لما بيتعرض لإجهاد و توتر عشان يقدر يكمل وظيفته تحت الضغط المعرض ليه.
الكورتيزول هو هرمون التوتر فى الجسم و ده بيتفرز لما الجسم بيبقى تحت ضغط سواء فى التمرين أو تحت ضغط عصبى و توتر, تخيل كإنك فى سباق و سايق عربية و التستوستيرون هو دواسة البنزين اللى كل لما تدوس عليها هتبقى أسرع و هتكسب السبق و الكورتيزول هو الفرامل اللى لازم تدوس عليها و تهدى السرعة عشان ماتعملش حادثة و تفضل مكمل السبق, جسمك لما بيتعرض لضغط عصبى كبير و إجهاد متواصل مستويات الكورتيزول بترتفع و الجسم بيقلل مستويات التستوستيرون عشان يفضل محافظ على توازن الهرمونات فى الجسم.
● التستوستيرون و التمرين:
التمرين بيسبب توتر و إجهاد على الجسم و بالتالى الجسم بيفرز هرمون الكورتيزول و الهدف الرئيسى للكورتيزول أثناء التمرين هو رفع مستوى السكر فى الدم عشان يخلى فيه جلوكوز متاح للجسم يقدر يستخدمه خصوصا فى الأماكن اللى الجسم محتاج فيها جلوكوز بشدة أثناء التمرين زى القلب و الرئة و العضلات.
التمارين المكثفة المتواصلة و التمارين الطويلة بتؤدى لرفع مستويات الكورتيزول بصورة كبيرة جدا و ده بيؤثر على مستويات هرمون التستوستيرون بشكل كبير جدا و بيخليها تقل و كمان مستويات الكورتيزول لما بترتفع بيأثر بالسلب على نظام المناعة عندك و بيبطىء عملية حرق الدهون.
● مدة و كثافة التمرين:
التمارين الطويلة زى التمارين بأوزان لفترات كبيرة متواصلة أو تمارين الكارديو زى الركض لمسافات كبيرة بترفع الكورتيزول أكتر من التمارين المتوسطة أو تمارين الكثافة العالية فى وقت قصير, و التمارين الطويلة مع الوقت بتؤدى للإجهاد العضلى المستمر و عدم القدرة على الإستشفاء بشكل كامل و إنخفاض الأداء التمرينى.
و عشان كده حاول إنك تنوع تمرينك بين التمارين الطويلة و المتوسطة و قصيرة المدة و نوع تمرينك كل فترة و ماتفضلش ثابت على نوع واحد من التمرين او على نوع كارديو واحد فترة طويلة عشان ماتوقعش فى فخ الكورتيزول و مستويات التستوستيرون تقل عندك و ده هيأثر على أدائك و هتلاقى صعوبة فى أنك تحقق النتائج اللى عايز توصلها.
