٣ أخطاء قاتلة أثناء التخسيس

كل الناس و هى بتخسس بتبقى مستعجلة النتيجة و مش قادرين يصبروا على المرحلة دى لأنها بتبقى محتاجة التزام كبير و صبر و عزيمة و كتير من الناس بتقع فى أخطاء ممكن تبطىء من عملية التخسيس أو توقفها خالص هنتكلم النهاردة عن أخطاء معظم الناس بتقع فيهم
 

:رفع مستوى التمرين بصورة مبالغ فيها بشكل مفاجىء

واحدة من أسرع الطرق لإبطاء عملية التمثيل الغذائي هو إنك تزود مستوى نشاطك الرياضى بشكل عشوائي غير محسوب مع نظام غذائي قليل جدا فى السعرات الحرارية مرة واحدة و طبعا لان جسمك زكى جدا و عنده ألية النجاة تحت أى ظرف هيتعرض ليه ف انت لما بتضغط على جسمك و تمرنه بصورة مبالغ فيها مرة واحدة (على سبيل المثال، تتمرن كارديو من 4-5 مرات في اليوم) مع النظام الغذائي قليل السعرات الحرارية, جسمك هنا هيحاربك و عشان عنده قابلية النجاة و مش عارف ايه اللى هيحصل بعد كده جسمك هيقلل عملية التمثيل الغذائى و هيأثر بشكل كبير على الجهاز العصبى المركزى و بالتالى عملية حرق الدهون هتقل بشكل كبير جدا

 حل المشكلة: ماتزودش تمرينك مرة واحدة ولا تقلل سعراتك الحرارية فى النظام الغذائى مرة واحدة بالعكس لازم تبتدى بالتدريج يعنى ماينفعش انك كنت بتتمرن ساعة فى اليوم مرة واحدة تخليهم 3 ساعات او كنت بتاكل 3000 سعر حرارى ف مرة واحدة هتخليهم 1500 زود تمرينك بالتدريج و قلل أكلك بالتدريج

:ماتكلش كربوهيدرات خالص

أظهرت الدراسات أن الكربوهيدرات عامل مهم جدا في مستويات ال (T3) و ده هرمون الغدة الدرقية اللي بتتحكم في عملية التمثيل الغذائي, الدراسات تمت على الناس اللى بتاكل صفر كربوهيدرات لمدة أسبوعين و النتيجة كانت انخفاض 47٪ في عملية التمثيل الغذائي. و التمارين الرياضية يمكن أن تتأثر بالسلب لأن الجليكوجين جزء من إنتاج (أدينوسين ثلاثي الفوسفات) و هو المركب الاساسى فى انتاج الطاقة في الجسم و أظهرت الدراسات ان تناول من 120-130 جم من الكربوهيدرات يوميا بيساعد على الحفاظ على مستويات صحية من هرمون ال (T3) وأظهرت الدراسات ان أقل كمية من الكربوهيدرات ممكن تاكلها و هتأثر بالسلب بصورة خفيفة على مستويات T3 هو 50 جم كربوهيدرات فى اليوم

 حل المشكلة: ماتدخلش فى نظام غذائى زيرو كربوهيدرات و لكن الأحسن طبقا للدراسات
انك تخصص يومين فى الأسبوع و الأفضل يبقوا ورا بعض تاكل فيهم كربوهيدرات قليلة جدا (أقل من 100 جم كربوهيدرات) الأسلوب ده بيساعد فى حرق الدهون بصورة كبيرة جدا و مش هيأثر على عملية التمثيل الغذائى

: تتمرن بأوزان خفيفة

طبعا مافيش حد ماسمعش الفتية اللى بتقول عايز تضخم ألعب بأوزان تقيلة و عدات قليلة عايز تخسس ألعب بأوزان خفيفة و عدات كتيرة, و طبعا الكلام ده خاطىء جدا و رقم واحد انك تخس أو تزيد هو نظامك الغذائى يعنى لو بتتمرن صح و مابتكلش مظبوط عمرك ماهتضخم و لو بتتمرن صح و عايز تخس و بتاكل غلط هتتخن و لو اتمرنت بأوزان خفيفة جدا أثناء فترة التخسيس ف من وجهة نظر جسمك العضلات الكتير اللى أنت اكتسبتها أثناء فترة الضخامة انت مش محتاجها و مابتستخدمهاش بالصورة المطلوبة و جسمك زى م قولنا زكى جدا و عشان دايما عنده قابلية للحفاظ على نفسه و النجاة ف انت العضلات اللى مش بتستخدمها دى مالهاش لازمة و بالتالى مع الوقت هتخس عضل بصورة كبيرة

 حل المشكلة: عالشان تحافظ على أقصى قدر من العضلات أثناء التخسيس لازم تشيل أوزان تقيلة عشان لما هتشيل أوزان تقيلة هتستخدم العضلات اللى اكتسبتها أثناء فترة التضخيم و بالتالى من وجهة نظر جسمك العضلات هيبقى ليها فايدة لانك بتستخدمها, طبعا أكيد مش هتلعب بنفس الأوزان بظبط اللى كنت بتلعب بيها أثناء فترة الضخامة لانك مقلل سعراتك الحرارية و مزود الكارديو بتاعك و الكربوهيدرات مش مرتفعة زى فترة التضخيم بس هتلعب ب حوالى 75%-85% من الوزن التقيل اللى كنت بتلعب بيه أثناء فترة التضخيم يعنى لو كنت بتجمع صدر ب 50 كجم يبقى فى فترة التخسيس هتجمع ب 35-40 كجم و هكذا مع التمرينات الأخرى (ممكن تمرينك يبقى مختلف عن كده تماما و بتشيل أوزان أكتر من فترة التضخيم كل ده متوقف على اللمدرب اللى بتابع معاه)