تأثير الافراط في التمرين على الجسم

ناس كتير بتفتكر إن كل ما تتمرن أكتر كل ما عضلاتهـا تكبر أكتر و يخس دهون أكتر أو لو عنده متلا عضلة اضعف من باقي العضلات يبقى الحل إنه كل 10 دقايق ينزل يمرن العضلة الضعيفة دي عشان تبقى اكبر و اقوي لكن الموضوع مش كده خالص بالعكس كده أنت بتعمل اجهاد و هدم للعضلة لانها مش بتلحق تاخد وقتها في الاستشفاء و بتحملها فوق طاقتها و ده هيضعفها أكتر

إزاي تعرف إن عندك اجهاد من التمرين

الم العضلات المستمر:

الطبيعي إنك تحس بألم العضلة زي الرجل مثلا لمدة يوم أو يومين بعد يوم تمرينها لكن لما يستمر ألمها لحد التمرينة الجديدة يبقى جسمك ماخدش الفترة الكافية للاستشفاء و طبعا ده هيأثر على نمو العضلة و قوتها و أدائها في التمرينة الجديدة.

الضعف و الكسل:

لما تلاقي نفسك مش قادر تروح شغلك أو تصحي بدري زي المعتاد أو كنت بتتمرن بوزن معين و فجأة اوزانك نزلت و مش عارف ترجعها تاني أو مالكش نفس تتمرن يبقى أنت بتتمرن أكتر من اللازم و بتعمل ارهاق للعضله بدون استشفاء كامل صحيح.

عدم ظهور نتائج على جسمك:

الطبيعي إنك لما تاكل و تتمرن و تنام كويس تظهر نتائج أفضل على جسمك لكن لما تكون بتعمل كل ده بصورة سليمة و مفيش نتيجة يبقى إنت بترهق جسمك زيادة عن اللازم و مابتريحش كويس.

خسارة الحجم العضلي:

لما تلاقي نفسك بتخسرعضلات مش دهون مع إنك بتاكل اكل صحى كويس جدا و بتتمرن باستمرار و بتنام كويس يبقى فيه مشكلة في طريقة تمرينك او أكلك أو نومك.