الترهلات بعد فقدان الوزن

لكل الناس اللى عندها زيادة فى الوزن بصورة كبيرة لما بيبتدوا يخسوا بشكل كبير بيبتدى يظهر جلد زائد المعروف بالترهلات و أهم حاجة فى الموضوع ده انك ماتقلقش خالص , الجلد عضو حى فى الجسم و هيرجع لطبيعته و للشكل اللى هيناسب جسمك الجديد بس ببطء, و العملية دى ممكن تستغرق مدة تصل إلى سنتين أو أكتر، و هنكلمكم على بعض النصائح اللى ممكن نعملها عشان نساعد فى شد الجلد بصورة أسرع و نحاول نعالج الموضوع على قد مانقدر

ماتفقدش وزنك بسرعة جدا:

فقدان الوزن بسرعة كبيرة بيأثر على مرونة الجلد بشكل قوى ده غير الؤثرات الأخرى الكتير زى تقدم العمر، وسوء التغذية، والجفاف، والتعرض المفرط للشمس، والتدخين بيأثروا على مرونة الجلد أيضا و مع نظام غذائى قاسي و تمرين مفرط لمدة ساعات و ساعات ده هيخليك تفقد دهون و عضلات فى نفس الوقت و ده بيعتبر صدمة للجلد, بعد ما كان فى كتلة عضلية حاملة الجلد أختفت الكتلة العضلية ومع فقد الدهون اللى بتخلى الجلد قابل للشد بيبتدى يظهر الجلد الزائد.

نصيحة

حاول ماتفقدش أكتر من 0.5 كجم الى 1 كجم فى الاسبوع واتأكد ان برنامج انقاص الوزن الخاص بيك يحتوى على رفع الأوزان بحيث لا تفقد من حجم عضلاتك بصورة كبيرة.

رطوبة جسمك:

الماء هو عنصر حاسم و مهم في الحفاظ على مرونة الجلد, و عشان كدة لازم تتأكد انك بتشرب فى اليوم ثلاثة لتر من الماء على الأقل و مع التمرين و الجو الحار احتياجك للماء هيزيد فوق الرقم ده.

اتغذى بشكل صحيح:

اثنين من العناصر اللازمة التي تحافظ على الجلد مشدود و به مرونة هي الكولاجين والإيلاستين. الأطعمة الغنية بالبروتين مثل الجبن والحليب والبقوليات، والحبوب والمكسرات، والسمك تحتوي على نسب جيدة جدا من الكولاجين والإيلاستين و اللى تعتبر العناصرالاساسية للحفاظ على صحة الجلد.

اهتم بصحة بشرتك:

البشرة محتاجة تغذية و رعاية اهتم دائما بالحمام الساخن و ممكن تستخدم كريمات شد الجلد مع المستحضرات العشبية و اللى بيبقى فيها مكونات مثل الألوفيرا، وحمض الهيالورونيك، خلاصة الخميرة، وبروتين الصويا وفيتامين (سى) وفيتامين (هـ) وفيتامين (أ) و كلها يمكن أن تساعد على ترطيب وزيادة تشكيل الكولاجين والإيلاستين في الجلد.

نصيحة

ابعد عن المنظفات القاسية على البشرة مثل الصابون والشامبو وسوائل غسل الاطباق اللى بيحتوا على الكبريتات، الحد من التعرض لأشعة الشمس الشديدة وعدم التعرض للماء الساخن المعالج بالكلور لان كل الاشياء دى بتقلل من مرونة الجلد.

امتى تقرر تعمل عملية

الترهلات مشكلة كبيرة بتواجه ناس كتير بعد لما يفقدوا وزنهم و مع الوقت لو الجلد زاد عن الحد بصورة كبيرة بيبقى صعب انه يرجع بالمرونة الكاملة و بالصورة المشدودة اللى انت محتاجها، و فى الوقت ده ناس كتير بتلجأ لجراحة التجميل لشد ورفع الجلد المترهل و لازم قبل ماتقرر انك هتعمل العملية تكون جربت كل النصائح دى و عدت فترة كبيرة و بالفعل الموضوع بقى بالنسبالك صعب و مالوش حل ساعتها ممكن تستشير طبيب جلدية متخصص و هو يقولك بظبط انت محتاج تعمل ايه وايه هى الخطوات المطلوبة.