اقراها أزاى
اللغز اللى بيحير ناس كتير هنوضحه بصورة بسيطة و هو ازاى تقرا الملصق اللى على اى حاجة بتشتريها و تفهم هو بيتكون من ايه
Serving size:
الرقم ده بيحددلك حجم الجرعة الواحدة قد ايه , يعنى مثلا الجرعة معلقة كبيرة او نص معلقة او ربع كوباية و هكذا و ده بيختلف حسب كل منتج و باقى الأرقام اللى فى بقية الملصق متحددة على حجم الجرعة الواحدة مش على كل العلبة.
Serving per container:
دى بتحدد العلبة دى فيها كام جرعة.
Amount Per Servings:
الرقم ده بيوضحلك الجرعة الواحدة فيها قد ايه من سعرات حرارية و بروتين و دهون و هكذا.
Calories :
الرقم ده بيقولك عدد السعرات الحرارية فى الجرعة الواحدة, عدد السعرات الحرارية نفسها مانقدرش نحكم بيه على منتج هو كويس و لا وحش سواء الرقم كبير او صغير يعنى مش عشان الرقم كبير يبقى وحش لأ, أهم حاجة السعرات الحرارية دى مصدرها صحى و لا لأ و هل مناسبة لأهدافك ولا لأ.
Total fat :
دى اللى فى ناس بتتخدع فيها كتير الدهون مهمة لجسمنا جدا و فى 3 أنواع من الدهون
(الغير مشبعة-المشبعة-المتحولة)
الصحية و مفيدة للجسم هى الغير مشبعة اللى متقسمة ل
(monounsaturated-polyunsaturated)
الباقى غير صحى و مضر للأنسان,الرقم اللى هتلاقيه قدمها ده مجموع الدهون الصحية و الغير صحية مجمع مع بعض.
Saturated fat :
الدهون المشبعة هي ببساطة جزيئات الدهون التي ليست لها روابط ثنائية بين جزيئات الكربون و مشبعة بجزيئات الهيدروجين و فى الأغلب بتبقى صلبة في درجة حرارة الغرفة و فى الأغلب بتيجى من مصادر حيوانية زى لحوم البقر الدهنية،الدواجن مع الجلد، منتجات الألبان الأخرى المصنوعة زى الجبن و الكريمة و الحلويات و بتشير دراسات كتير ان كثرتها بيؤدى الى ارتفاع الكوليسترول السىء و أمراض القلب.
Trans fat :
دى أخطر حاجة دى الدهون المتحولة و دى اللى بتتصنع عندما يضاف الهيدروجين إلى الزيوت النباتية و بيتحول الى السمن الصناعى و بيستخدم فى الوجبات السريعة و الحلويات و طبعا بيتم تصنيعها عن طريق هدرجة الزيوت و معالجتها.
Cholesterol :
ده رقم الكوليسترول حاول تاكل أقل من 200-300 مجم كحد أقصى فى اليوم.
Sodium :
ده الرقم اللى بيوضحلك قد ايه كمية الصوديوم (ملح) فى الجرعة الواحدة حاول تاكل 2200 مجم كحد أقصى فى اليوم.
Total carbohydrates :
الكربوهيدرات مصدر الطاقة لجسم الأنسان و الرقم بيوضح عدد جرامات الكربوهيدرات.
Dietary Fiber :
عدد الالياف الموجودة و دى اللى بتساعد فى الأحساس بالشبع و بتساعد فى الهضم.
Sugars :
رقم بيوضح عدد جرامات السكر و هو مصدر أخر للطاقة و لكن الأكل منه بكثرة غلط جدا و طبقا لجمعية القلب الأمريكية أقصى كمية تأكل في يوم واحد للرجال 150 سعر حراري في اليوم الواحد (37.5 جرام أو 9 معالق صغيرة) و للنساء 100 سعر حراري في اليوم الواحد (25 جرام أو 6 معالق صغيرة) و طبعا دول يبقوا من مصدر صحى زى الفواكه مش من السكر الصناعى المتعارف عليه.
Protein :
البروتين و هو من أهم مصادر التغذية و طبعا هو الأساسى فى بناء العضلات و الرقم بيوضحلك عدد جرامات البروتين فى الجرعة الواحدة .
Vitamins & Minerals :
ده بيوضحلك نسب الفيتامينات و المعادن فى المنتج ده.
Daily Value :
بيوضحلك ان النسب الموضحة على الملصق هى لنظام مبنى على 2000 سعر حرارى فى اليوم .
حاول على قد ماتقدر تقرأ الملصق الخاص بأى منتج بتشتريه و تفهم فيه قد ايه من كل حاجة و مصنع من ايه بظبط و حاول تبعد عن المنتجات المليانة بشراب الذرة و السكريات الزائدة و الأملاح المرتفعة و الزيوت المهدرجة و الدهون .